Қазақстан Республикасының үш ұлттық театрының: Республикалық мемлекеттік академиялық корей музыкалық комедия театрының, Қ. Қожамияров атындағы Республикалық мемлекеттік академиялық Ұйғыр музыкалық комедия театрының және Республикалық академиялық неміс драма театрының ынтымақтастығына негізделген бірегей театрлық жоба Қазақстан халқы Ассамблеясының 30 жылдығына орай ұйымдастырылған.
Жобаның негізгі мақсаты – мәдени және шығармашылық байланыстарды нығайту, көрермен аудиториясын кеңейту, кәсіби тәжірибе алмасу және ынтымақтастықты дамыту.
Театр – мәдени құндылықтарды сақтау мен жеткізудің маңызды құралы. Көпұлтты Қазақстанда театр өнері мәдениетаралық диалогтың дамуына және этносаралық өзара әрекеттестікті нығайтуға ерекше үлес қосады. Бұл жоба мәдени әртүрлілікті қолдауға және театрлық өзара іс-қимылдың жаңа түрлерін қалыптастыруға бағытталған.
Жоба театр ұжымдарының өзара ынтымақтастығына және актерлердің кәсіби біліктіліктерін жетілдіруге арналған бірқатар іс-шараларды қамтиды.
27 ақпанда корей театрының сахнасында шығармашылық зертхананың екінші кезеңі өтті. Бір қуантатыны, бұл жобаға тек шығармашылық бағытта білім алатын студенттер ғана емес, сонымен қатар оқытушылар, театр сыншылары мен жаңалық порталдарының өкілдері де қызығушылық танытуда.
Жобаның бастамашысы – театрымыздың режиссері Екатерина Пен. Идеяны жүзеге асырушы бастамашыл топ Темірбек Жүргенов атындағы Қазақ ұлттық өнер академиясының магистранттарынан құралған, олар үш ұлттық театрдың режиссерлері мен актерлері болып табылады.
Бұл жоба қаламыздағы театр ұжымдарының жастарын біріктіреді деп үміттенеміз, әсіресе мұндай науқан Алматы театрларының арасында бұрын болған, тек бағыты мен форматы жағынан сәл өзгеше болғанын атап өткен жөн.
Жаңалықтарымызды жіберіп алмаңыздар!