1-2 ақпан күндері Корей театрының сахнасында «Қысқы түндегі түс» атты жаңажылдық театрландырылған қойылымның тұсаукесері өтті!
Шығыс Жаңа жылын атап өтуге арналған Қазақстан корейлер қауымдастығымен бірлескен бұл іс-шара ерекше форматта ұйымдастырылды. Көрермендер Шығыс дәстүрлері мен Еуропа мерекелерінің әсемдігі тоғысқан сиқырлы әлемге еніп кетті.
Бұл – Шекспир шығармаларының корей мәдениетіне бейімделуі ме, әлде корей дәстүрлерінің еуропалық үлгіде жаңаша көрініс табуы ма – нақты айту қиын. Бірақ көрермендердің пікірі бір жерден шықты: ерекше, өте қызықты, әсем, кәсіби деңгейде орындалған, әсерлі әрі жарқын қойылым!
Кез келген күтпеген идеяларды жүзеге асыруға және көрермендер жүрегінен орын табуға мүмкіндік берген әрқайсыңызға алғысымызды білдіреміз!
Қазақстан корейлер қауымдастығына ең батыл әрі ерекше шығармашылық жобаларды қолдағаны үшін рақмет айтамыз.
Біз болашақта да көрермендерімізді жаңа қойылымдар мен ынтымақтас жобалармен қуантуды жалғастырамыз. Сіздерді өзіміздің тұсаукесерлерімізде күтеміз! Керемет әсер алатыныңызға уәде береміз!