15 ақпанда театр сахнасында Корея Республикасынан арнайы шақырылған мейман Чой Тэ Сон мырзаның қатысуымен корейдің дәстүрлі және мәнерлі хореографиялық би қойылымының тұсаукесері өтті!
«ХАРУ | ТӘУЛІК» – бұл корей дәстүрлі және заманауи биінің үйлесімді тоғысуы, онда әрбір сәт корей мәдениетіне тән сұлулық, терең сезім және үндестіктің бейнесін ашады. Қойылым бір күннің (адам өміріндегі бір тәуліктің) астарлы мәнін көрсетіп, көрерменді біресе күлдіртіп, біресе жылатып, естен кетпес ерекше әсерге бөлейді.
Қойылымның хореографиясын жоғары деңгейдегі шеберлер әзірледі:
Чой Тэ Сон — корей дәстүрлі өнерінің танымал шебері, Ханъянг университетінің докторы, Чонджу университетінің оқыту орталығының директоры және Мунмо-ильму дәстүрлі өнер орталығының бас директорының орынбасары. Пусан Тонрэ дәстүрлі музыкасы бойынша Президент сыйлығының лауреаты ретінде ол қойылымға Кореяның мәдени мұрасының қайталанбас үнін қосты.
Анна Цой — Республикалық мемлекеттік академиялық корей театрының бас балетмейстері және хореограф-қоюшысы. Дененің иілімдігілімен ерекшеленетін қойылымдары көрерменнің көзайымына айналған.
ХАРУ | ТӘУЛІК — бұл тек би ғана емес. Бұл – қозғалыста көрініс тапқан философия, уақыттың өткінші екенін және әрбір сәттің бағалы екенін еске салу.
Қойылымға келесі театр әртістері қатысты:
Пак Константин, Лян Тимур, Хван Валерия, Бакытханова Гульмира, Бапова Аяна, Цой Елена, Ержигитова Лаура, Ашимова Енлик, Клишин Александр, Зейнолла Акбота, Ким Надежда, Когай Виктория, Кадирова Асем, Искандыров Алиби, сондай-ақ театрдың бас балетмейстері Анна Цой.
Сонымен қатар, көрермендерді РК халық әртісі Римма Ким жетекшілік ететін корей театрының «Бидульги» би студиясының бишілері өнерімен тәнті етті. Көркемдік жетекшісі Александра Цхай бастаған студия мүшелері қайталанбас екі дәстүрлі биді ұсынды, оның бірін Анна Цой қойса, екіншісін қыздар Корея Республикасының Ұлттық Гугак орталығындағы тағылымдамадан кейін тұңғыш рет орындады.
Таным мен сезімге толы осы ерекше би мерекесін бізбен бірге бөліскен барша көрерменге алғыс білдіреміз! Ал біз сіздер үшін әлі де көптеген қызықты, танымдық және қайталанбас ерекше қойылымдар дайындаудамыз!