Бүгін театр сахнасында «Елес сұлбасы» пластикалық спектаклінің төртінші көрсетілімі өтті!
Корей театры мен «Самұрық» заманауи би театрының хореографиялық ұжымдарының бірлескен қойылымы Қазақстандағы би өнерінің тың бағыттарын паш етті.
Бұл жобада заманауи үрдістер мен ежелгі салт-дәстүр біртұтас үйлесім тапты. Дәстүрлі корей биі мен заманауи контемпорари биінің қандай ортақ тұстары бар? Контемпорари – қазіргі заманғы сахналық бидің сан алуан бағыттары мен техникасын біріктіретін стиль. Оның дәстүрлі корей биімен тоғысатын тұстары – ішкі ұстамдылық, екпінді тыныс алу, бапты қимыл және табанды өкшелеп басу. Корей мәнерінде қадам басу – өнердің ерекше бір түрі.
Сахнада бірде-бір сөз айтылмаса да, әртістердің өне бойды баурап алар қимылдары жан дүниемізді үрей мен күдікке бөледі. Үнсіз қозғалыс, көзқарас және тыныс арқылы жеткізілген әрі диалог, әрі монолог болды.
Жас театр мамандары әртүрлі зертханалар мен коллаборацияларда визуалдылық пен материалды вербалды емес тәсілдермен ұсынуға ерекше мән береді. Бұл көрерменді баурап алып, ойлануға итермелейді.
Осы кешті бізбен бірге бөліскен барлық көрермендерімізге алғысымызды білдіреміз! Алдағы қойылымдарымызда жолыққанша! Бірге жаңа көкжиектерді ашып, мәдениетіміздің сан қырымен танысайық!